((شوقي انطفى)) 

الشاعر الشريف حمد العبدلي الهاجس

سديت باب اللي لاودى ولاجاب

ولالي رجا في اللي يمده وجايب

ماعاد له عندي كرامه وترحاب

ولاني بهل الدمع لجله نحايب

خاب الامل في علاقته والرجا خاب

ولاني من اللي يرتجي شخص خايب

شوقي انطفى من عقب ماكان لهّاب

خليه يروىٰ من حرور اللهايب

ماهمني ان جاء اوراح او غاب

ماكل عينً تشتكي كل غايب

اللي يروح بدون شرهه ولا اسباب

عساه مايرجع ولو من القرايب

عن صحبة الانذال انا خاطري طاب

والخافق اللي قد لعب فيه طايب

قلبي صدوقً وافيٍ كيف ينعاب

مايعيّبه لوعيّبه شخص عايب

مشاهد الغالين من راس مرقاب

اهون من اللي مشاهده بالرقايب

البعد بلوى وعارضي من العنى شاب

شيب القلوب العاشقه عشق شايب

ماني بحريص يهمّني جني الالقاب

اهم ماعندي الصبر في النوايب

عشقٍ على غفلة مع أحد الاغراب

سجلتها غلطه واحدىٰ الغرايب

حتى ولو رصيدة ملايين في ساب

ماظنتي في يوم نرجع نسايب

ادوس راس الحيّه الرقطا والداب

تاريخهم اسود في حبك المصايب

يتفننو بعناد في اتلاف الاعصاب

ومادروا اني كفو افك النشايب

مالي بصحبة خاين العشره نصّاب

لين تنبني من فوق راسي النصايب

اتوب عن حبه ولو مابعد تاب

واصير من عقب المعاناة تايب

شديت للي غاليه شد وركاب

وانوّخ ركاب الفكر والركايب

الله عوضني بشاهه عن احباب

وصرنا بعد شهرين اطلق حبايب

كتبنا من عقب الغلا عَقد وكتاب

وبحبنا بنصد جيش وكتايب

نعدّل الاعوج ولا نخشى الاشناب

وندفع اللي يقول فينا ضرايب

نهد هد الحُرّ من وكْر لعقاب

ونذوّب اللي مابعد كان ذايب

ولا نهم اللي سكن سهل وهضاب

نقدم ولا نخشى عجاج الكثايب

يارب يامنشي السحب رب الارباب

تسعدنا ماهبت رياح الهبايب