تَرَى الزّعامه ماهي قالت وُإلَّا قيل*أكِيد قَـبَلْ أقوالـنا تلقى الفِعَال
وْزَعِيم آسيا جَدَّدَ الماضي الأصيل**إنجازه اللي ماطَرَى فيه الزّوال
_ _ _
دُقّوا التَحيَّه لْصانِعَ المَجْدَ النّبيل*كلِّن يبارك بالفَخَر نادي الهِلال
اللي عزومه ماتِهَابَ المستحيل* في كلِّ ساحاتَ التّحدّي والنِّزال
_ _ _
تَسْمَع على ميدانها قَرْعَ الصّليل**سَطَّر على الفرحه مضامينَ المنال
حازَ البطولهُ وْطَوَّعَ الدَّربَ الطويل**يوم إِنْ تِمَيَّز بالوفا والإرتجال
_ _ _
لاصار خَصْمَه فوق ملعبنا هزيل*وَأهدافنا تَمْطِرْ على اِشْبَاكه نِبَال
والموجَ الأزرق جاكم الأمواج سيل**لَجْلَك يالأزرق تِعْتَنِيْ ردَّ السّؤال
_ _ _
نَبْضَ المشاعر سَاقها راضي الطّويل**للمملكه وُاِنجازنا فاقَ الخَيَال
وُلْكِلْ هلالي ما نسَى ردَّ الجميل*أغلى نياشينَ الفَخَر مابَه جِـدَال
_ _ _
أهْدِي بُوعبدالله نعيم شُكْرِي الجزيل**وأفراحنا تنثر قوافيها الجِزَال
وُأمير البقال طاف بالسّاحات خيل**وْلَكْ يالحباري بالعطا والإمتثال
_ _ _
يا زعيم آسيا ما أبد مِنّك مثيل* ياللي شموخك يعتلي هامَ الجِبَال
في عِشْقَتَكْ يا زعيمنا جيلٍ وُجيل**نلقى البشاير حولنا في خير حال
_ _ _
اليوم إسمك لاح بالسّيفَ الصّقيل*نَظْمَ المدايح فيك بالفرحه سِجَال
نِلْتَ الزّعامه والزّعامه لِكْ تِميل**والمُوجَ الأزرق عَنْ يمينك والشِّمَال
_ _ _
هذي نجومك أشْرَقَتْ في كلِّ ليل**يامَوْطِنَ الأمجاد تلقى الطِّيِبْ فال
أنا هـلالي والفَـخَر أكـبر دليل *وْقلـبي هلالي والـغلا دونه مُـحَال
راضي بن محمد الطويل
