((حقوق الناس))

الشاعر الشريف حمد العبدلي الهاجس

لالاتقول الوقت ياخوك جاير
الجور من فعلت غريبين الاطوار

الوقت هذا صاروا خلف الستاير
ناسً ضعاف نفوس ماتحشم الجار

تتبع عقول معاشرتهم خساير
ماتحسب لجنه ولا تحسب لنار

عميت تدابير العقل والبصاير
صاروا على بعض القبايل وسم عار

وناسً تشجعهم تزف البشاير
تنشر لهم اردى الفعايل والاخبار

عقل الخفيف اصبح مع القوم طاير
الا الذي جالس حكيمين الاشوار

اللي لهم بصمه في سلم العشاير
تحفظ حقوق الناس ماتبيح الاسرار

وشيخهم لا مات هلوا العباير
شيخ الحميه يحمي الدار والجار

يارب ياللي مطلع عالسراير
تصلح قلوب الناس وتطيل الاعمار

وتصلح نواياهم بوسط الضماير
ونعيش تالي العمر من ضمن الاخيار