تدرون ويش اصعب من الفقد والموت
موت المشاعر بين خل وخليله
تعيش طول العمر كنك بتابوت
وتمشي معا العالم ونفسك قتيله
وتحس صدق ان الهوى شي موقوت
معا مرور الوقت .. يذبل حصيـله
في وسط صدرك هم الامال منحوت
غربه و احساسيس وجروح دخيله
يامصعب الذكرى اذا فاتك الفوت
ولا فيه لك غايه ولا لك وسيله
يسري بك الهاجوس والصدر مكبوت
في ذكريات كانت اشياء جميله
صارت فعل ماضي على جرح وشتوت
لا من طرت سكة عـناها طويله
ذكرى عليها كنت بسنين مبخوت
قصر” بنينا انهد في ظرف ليله
يعـزف بها ضيق الزمن عزفت النوت
على تلاشي حلم اكد رحيله
اصيح انا واصيح وما ينفع الصوت
لان المشاعر شي صعب بديله
بقلم الشاعر / سعيد بن وارد
