حبيت وحده جميله قمه بالأخلاق
ما شفت حرمه بشيمتها و حشمتها
جمالها غير يعجب معظم الأذواق
مثل المها تعجب العين شوفتها
بعيونها سحر فاتن و الجبين براق
تجذب عيون الخلايق بابتسامتها
من زينها يخضع لها الكل والأعناق
مثل الحمامه بهمستها و مشيتها
احبها موت وتسكن داخل الأعماق
بصدق احساس انا والله حبيتها
كانت بقربي تطفي لوعة الاشواق
أمشي بطريقي وانا سارح بصورتها
عشنا سنين نروي العطش بعناق
ويرقص فؤادي من الفرحه بجيتها
لو هي بقربي احس إني لها مشتاق
ياشين حالي اذا طالت في غيبتها
لكن خسارة تبدل وصلنا بفراق
ظروف صارت و تجبرني بفرقتها
راحت وقلبي تقطع مثلما الأوراق
الروح ضاقت وهي مثلي بحسرتها
من بعدها خاطري للأسف ما راق
و اسود الكون بعيوني في غيبتها
البعد عنها حقيقه امر ما ينطاق
و اليوم ارثي بدمع القهر عشرتها
شعر/ مصبح قاسم أبو عبدالله
٢٤ / ١٢ / ١٤٤٣هجري
