يافاتن الروح لك في مهجتي محـــــراب
ياليت يسكــــن خيـــالي دوم محرابـــك
لي في اشتياقي لوصلك ياحبيب اسباب
وأنت في الهجــــر خبرني عن اسبابـــك
أهـــــواك احبــــك ترانا من زمان احبـاب
وش صـــار لك دوم تنسى وصل أحبابـك
جيتك وفي خاطــري لومـك وفيه اعتاب
ياليت تسمــــح لمن يهـــــواك باعتابــــك
كنت انتظــر يوم جيتك ياالغـــلا ترحـاب
لكن حسافـــة خــذلني صوت ترحابــــك
جيتك وفي القلب لوعة بعد طول غيــاب
أرجــــاك لا عــــد تكثـــــــر زود بغيابـــك
أفتــــح لقلبي بقلبـــــــك ياحبيبي بــــاب
تعبت وانا انتظـــــر ياخـــل في بابـــــــك
خليني اكتب شعــــوري في هواك اكتــاب
واجعـــــل عنــــاوين حبي أول اكتابــــك
لإن صوتـــــك بسمعي أغنيـــــة واطـراب
وابيـــــات شعــــري أبيها نغمـــة اطرابـك
كـذاب من قـال لي اقدر اتركــك كــــذاب
لا سامـــــح اللــــه من يافــاتني عابـــــك
من يــــوم شفتك فؤادي في المحبة ذاب
وشموس روحي تجلت فـــوق مرقابــــك
دوم اشكــــر اللي دعوته يحفظك وأجاب
والحمـــد للواحـــد اللي ياالغــــلا جابـــك
*نجلاء العريفي ديوان النجلاء* صدر حديثا
