ياصاحبي ترى المطر يعقب الغيم
وانته غيومك دايمه ما لها امطار.!!
حتى الالم والحزن ومنابع الديم
بالجوف ترزم / كلما لاح تذكار
يعني نسيت الودّ / والزهر والنيم
ونسيت نبضي والأماني والاشعار
تدري متى تشعر بغلطتك والضيم
لي شفتني قدمك وصديت بإكبار
في حينها تقلط همومك معازيم
والليل يسري بك تناهيد / سمّار
وأن صك باب الشوق تبدأ مراسيم
جف العطر والورد والبرك والشار
وان بعثرت ذكرى عزوف الترانيم
وجار نبض العشق في خاطرك جار
تفهق ضلوعك مثل حن المجاهيم
تبحث عن الاعذار ماتلمس اعذار
وتغيب عن عالمك وتهيم / وتهيم
والشوق مايرحم وله قلب محتار
ياصاحبي دام ان شوقي مرازيم
قرب وطف الجمر فالشوق عذّار
بقلم
احمد المنتشري
